Собор Всех Швейцарских святых
Молитвы всем Святым земли Швейцарския
Тропарь, глас 8-й
Я́коже пло́д кра́сный Твоего́ спаси́тельнаго се́яния, / земля́ Швейца́рская прино́сит Ти́, Го́споди,/ вся́ святы́я, в то́й просия́вшия. / Те́х моли́твами в ми́ре глубо́це // Це́рковь и Оте́чество на́ше си́лою Креста́ Твоего́ соблюди́, Многоми́лостиве.
Кондак, глас 4
Егда́ обре́те ме́сто Га́лл, / е́же на поще́ние ему́ предназна́чил еси́, Влады́ко, / воздви́же Кре́ст и Тебе́ воспе́: / Го́споди Иису́се Христе́, / И́же челове́чество спасы́й на Кресте́, / благоволи́ да ме́сто сие́ Тебе́ посвяти́тся / и не умолчи́т когда́ пе́ти Тебе́ хвалы́.
И́кос
Прииди́те, лю́дие ве́рнии, / гла́с на́ш причте́м ко гла́су Маври́кия со дружи́ною, / святы́х святи́телей и пусты́нник, и про́сим: / Влады́ко вся́кия тва́ри / да́руй душа́м на́шим спасе́ние, / да земля Швейцарская, ю́же заступа́еши Кресто́м Твои́м Честны́м, / не умолчи́т когда́ пе́ти Тебе́ хвалы́.
Молитва всем Святым земли Швейцарския
О святии, иже в земли Швейцарстей просиявшии, яко плод красный и земли сея благое прозябение, приносим вас Господу с радостию велиею мы, вернии чада швейцарския. Якоже свет Евангелия нам принесли есте, страну нашу невредиму от века сотворившии и от навет вражиих соблюдшии. Тем явистеся светильницы Церкве, не под спудом, но на свещнице поставлени, да светите всем, храмину земли сея освещающе. Молим убо вас, о честнии друзи Божии, да будите нам заступницы крепции, образ непреложный нам полагая.
О святии Варна́во, Беа́те и Аха́те, Колумба́не, Га́лле, Фридоли́не и вси проповедницы, гласу Божию последовавшии и народы страны сея ученицы Христовы соделавшии: помозите убо и нам Слово Божие в веце сем безбоязненно проповедовати.
О святии Амвро́сие, Фе́ликсе, Або́ндие, Лу́кие, Ма́рие, Феоду́ле, Бе́нно, Пирми́не, Иоа́нне и Нико́лае и вси священноначальницы, Церковь Господню в земли сея воздвигшии: даруйте убо и нам церковь сию яко Тело Христово соблюдати, юже, яко святии благовернии князи Сигисмунд и Клотильда, сохраняти.
О святии Маври́кие, Ви́кторе, У́рсе, Фе́ликсе, Ре́гуло и вси святии мученицы фивейстии и ньонстии; о святая Урсу́ло с Панта́лием и сопутницы ея; о святии Ге́рмане, Плаки́до, Рандоа́льде, Эмери́то и Евсе́вие, землю Швейцарскую своею кровию крестившии: нам же помозите во всем житии нашем свидетельствовати о любви Христовой и обновлении честною Его Кровию.
О святии Рома́не и Лупики́ние со сродницею Ио́лою; Име́рие, Урси́кие и вси святии пустынницы; о святой О́тмаре и вси преподобнии отцы Свято-Галльския; о святой Ма́йнраде и вси преподобнии отцы Айнзи́дельнстии; о святой Севери́не и вси преподобнии отцы ага́унстии, о святой Зигисбе́рте и вси преподобнии отцы Рети́йския и вы, о святии Оти́лие и Вибора́до, светильницы светлии воздержания, Царствие Божие избравше и покаяния всесмиреннаго сподобившеся, темже да сподобимся и мы покаяние стяжати и Царствия Божия и правды его искати.
О святая праведная Вере́но, цвете фивейский и плоде дивный любви Божия ко Отечеству нашему, научи убо и нас любити Господа Бога нашего и ближнего своего всем сердцем, всею душою и всем помышлением.
Да возрадуемся и возвеселимся днесь память вашу совершающе, о святителие Христови, благодать Божию земли Швейцарския стяжавшии. Мы же, недостойни суще, торжество ваше со страхом и трепетом празднуем и умильно вопием: наипаче помозите нам, угодницы Божии, Крест Господень на рамо вземше, усердно Тому последовати, во еже освятитися и сохранитися стране сей силою на Немже пропятого Господа нашего Иисуса Христа, во ад сшедшаго и смерть поправшаго по благоволению Его Собезначального Отца; Имже освященнаго, со Святым и животворящим его Духом, ныне и присно и во веки веков. Аминь.
Молитва акафиста
О святии Гельвеции, славнии апостоли земли языческия, монашескаго жития начальницы, честнии иноцы и инокини, землю сию возделавше, семя веры православныя в души паствы вашея посеяли есте. Святии пустынницы, отшельницы и безмолвницы, образ райский купно явисте, идеже дуси праведных от краев земли ныне на небеси в любви Христовой яко небесножителие ликовствуют.
Возмолитеся о нас, сущих на земли, да дарует Господь верным чадом Его твердость духа, долготерпение, веру крепку и нерушиму, во еже сподобитися и нам вкупе с вами во обителех небесных водворитися, в нихже пребывая со Отцем и Сыном и Святым Духом, ныне и присно и во веки веков. Аминь
