Молитвы святей преподобномученице Вибораде 

​

Тропарь (глас 5)

Келлию в дом себе воздвигши, и в той премудрости поревновавши, Господеви твоему Иже даде тебе уста и премудрость, послужила еси, отонудуже и имя твое красящи, священство, и князи, и люди же советы твоими научаше, о Виборадо. Темже моли Христа, Божию Премудрость, да просветит и души нашя.

​

Кондак (глас 4)

Премудрость во исходех вопиет, якоже древле проповедник возвести, ты же, о богомудрая Виборадо, той ухо твое приклонила еси и сердце предала еси твое разуму: мир убо весь телесне презревши, к нашим скорбем и нуждам призрела еси твоими Божественными советы, еже советница имущи тебе имя. Темже Христа моли, Великаго Совета Ангела, да вселится и в сердца нашя Того премудрость.

​

​

Молитва святей преподобномученице Вибораде о богопосланнем совете и заступлении.

О святая и премудрая преподобномученице Виборадо, ты убо в затвор келлии твоея затворилася еси, возлюбивши истину безвестную и тайную, в немже еси познала тайная Премудрости. Тебе даде Господь уста и премудрость, ейже не возмогут противитися или отвещати вси противляющиися ти. Той убо тобою князи настави волею Своею, и обитель твою от нашествия Угрина соблюде. 
Ныне же к тебе припадаем, смиреннии и обремененнии, иже во всяцем мудровании нашем до конца изнемогохом: призри убо на попечения, яже обстоят ны, призри на уныние сердец наших, призри же и на произволение наше, еже вся по Бозе творити. Темже молим тя: подаждь нам совет твой, якоже Ульриху святителю и Ангелверту авве совещала еси. Вразуми ны, якоже вразумила еси Бурхарда князя, помози нам во обстояниих, яже ны стужают, мудре преити, утверди ны, во еже не своея воли, но Божия искати. О святая мати Виборадо, моли Господа, кроме Негоже всуе зиждут зиждущии и всуе бдит стрегий, да Сам наставит ны смыслом Его судити, яко бо на Него упование наше и Той есть всяческая Премудрость, со Отцем и Святым Духом, ныне и присно и во веки веков, аминь.

 

Молитва ина святей Вибораде, отъемлющей возбранения на пути к Церкви.

О всечестная мати, ты убо противостала еси кознем диавольским, хотящим отвратити тя от пути святаго ужасными страхованьми и привиденьми лютыми. Ты убо, воительнице Христова, знамением Креста низложила еси всякое противление вражие, и бесы силе Божией покорши, попрала еси выю тем пятою, якоже боязнию вопити им: сия Виборада ногою своею раздроби хребты и руцы нашя, сего ради не можем ктому бегство отлагати, и отступиша с нуждею. 
К тебе убо припадаем ныне, о образе нам в последовании Христовем, от диавола угнетаемым, иже мудростию века сего, человеческим стужанием и мятежем страстей наших тщится отвратити ны от вожделеннаго Царствия Небеснаго. 
Подаждь нам крепость мышцы твоея, и твое упование на силу Крестную, всякое зло побеждающую. Укрепи нас [или раба Божия имярек] на пути Христовем, Иже есть Алфа и Омега, Начаток и Конец, дающему жаждущим от источника воды животныя туне. Моли Христа, Иже есть Путь и Истина и Живот, да исправит пред Собою стези нашя [или его, или ея], да умягчит сердца, мир сотворит и всякое благое возрастит. 
Сама же, преподобная мати, буди нам [или ему, или ей] спутница: отрази нахождения вражия и укрепи ны на пути сем силою, терпением и мудростию, да не претыкании одолеваеми будем, но паче преспеваем в службе Божией. Простри руку твою нам [или рабу Божию имярек], и путеводи ны [или его] в дом Божий и во общение Тела Христова, да Господу, истинней Лозе, всаждени бывше, возрастим пло- ды в Царствии Отца и Сына и Святаго Духа, аминь.

​

Ака́фист святей преподобномученице Вибора́де Сове́тнице, я́же в Ла́вре святаго Га́лла.